Вицепремиерот Анѓушев во работна посета на СР Германија – силна германска поддршка за поинтензивен економски раст и создавање реална и одржлива економија

06 февруари 2019

Заменик претседателот на Владата задолжен за економски прашања, д-р Кочо Анѓушев, како копретседавач на Мешовитиот управувачки комитет помеѓу нашата земја и СР Германија, денес реализира еднодневна посета во Берлин. 

За време на посетата  Вицепремиерот се сретна со Државната секретарка во Сојузното министерство за економија и енергетика г-ѓа Клаудиа Дер Вос, по што се одржа и оперативен состанок со копретседавачот на комитетот од германска страна г-дин Хелге Толксдорф, на кој се дискутираа конкретни чекори и мерки за соработка помеѓу Владите, особено за германската поддршка за поинтензивен економски раст и креирање на реална и одржлива економија во нашата земја.

На состанокот со државната секретарка Дер Вос, Вицепремиерот Анѓушев потенцираше дека со денешното потпишување на протоколот за пристапување кон НАТО, се реализира една стратешка цел на нашата земја, се обезбедува стабилност и подобра бизнис клима преку која се очекува нов наплив на странски инвестиции. Тој додаде дека СР Германија е прв трговски партнер на нашата земја со 3,64 милијарди евра обем и 15% раст на размената во 2018, во однос на 2017 година.

„Благодарни сме на поддршката од Владата на СР Германија во реализацијата на евро-атлантските интеграции на нашата земја.  Денес се остварува децениската стратешка цел за пристапување кон НАТО, со што се обезбедува еден од фундаменталните услови за побрз и поинтензивен развој, особено на економијата. Со стабилноста која ја добиваме со членстството во НАТО, очекуваме зголемен интерес од странските инвеститори, особено оние кои доаѓаат од Германија“, нагласи Анѓушев.

Државна секратарка во Сојузното министерство за економија и енергетика, Клаудиа Дер Вос, ги поздрави чекорите кои Владата ги презема во насока на интеграцијата во НАТО и ЕУ  и се согласи дека тој процес ќе донесе политичка стабилност и сигурност, што е клучен адут во привлекување на нови инвестиции. Таа дополни дека СР Германија ќе ја поддржи земјата во спроведување на реформите за пристапување кон ЕУ.

Вицепремиерот Анѓушев, на состанокот, ја потенцираше подготвеноста и одлучноста на Владата, со ставање во целосна функција на сите капацитети во земјата да се завршат реформските процеси во земјата, сите предизвици и проблеми со кои се соочува земјата да бидат надминати во најбрз можен рок, пред се да се создадат услови за побрз економски развој и подобра животен стандард, а потоа и за станување полноправна членка во ЕУ. 

По оваа средба се одржа и оперативен состанок на Мешовитиот управувачки комитет на Владите на двете земји, со кои претседаваат вицепремиерот Анѓушев, од македонска страна и г-дин Хелге Толксдорф, раководител на Оддел за ЕУ проширување, Југоисточна Европа и Турција во Сојузното министерство за економија и енергетика на Германија.

„Дискутиравме за идните чекори за продлабочување на нашите економски односи со Македонија. Досега имаме нов рекорд во трговската размена што изнесува над 4 милијарди долари, минатата година, со реални изгледи трговската размена да продолжи да расте. Меѓусебната соработка ќе се концентрираме да ја продлабочиме во повеќе сектори, со особен фокус во полето на дуалното образование, за создавање на  пристојни работни места за младите луѓе во Вашата земја, со рализација на инвестиции од германски компании“, нагласи Толксдорф по работниот состанок.

Вицепремиерот Анѓушев подвлече дека СР Германија покажа дека е пријателска држава која што досега многу помогна на патот кон ЕУ и НАТО интеграциите, при што нагласи дека поддршката од оваа земја допрва доаѓа. 

„По завршување на политичките процеси, важно е да обезбедиме подобар живот за граѓаните, а тоа ќе го постигнеме преку добра и реална економија. Нема подобро место во светот од каде што може да се научи повеќе за економијата и индустријата од Германија и затоа го формиравме Мешовитиот управувачки комитет помеѓу македонската и германската Влада. Во рамките на тој Комитет работиме да обезбедиме што е можно повеќе поддршка од страна на Владата на СР Германија во развојот на македонската економија. На денешната средба договоривме договоривме кога ќе дојде советникот од Владата на Германија во нашата земја. Тоа ќе се случи кон крајот на февруари годинава, го знаеме и името на еден искусен професионалец од Германија, кој веруваме ќе даде голем придонес кон нашите структурни реформи и едукацијата на нашата администрација во полето на пристап кон фондовите од ЕУ кои ќе имаме право да ги користиме во наредниот период. На тој начин, сметам дека ќе стекнеме квалификации за тоа како подобро да ги искористиме европските фондови во интерес на нашите граѓани за реализација на инфраструктурни проекти и сите останати делови од економијата. Што се однесува до реалните проекти, преку активностите на Мешовитиот управувачки комитет и преку финансиските институции во Германија ќе обезбедиме средства коишто ќе ги договориме во рамки на МУК за спроведување на инфраструктурни проекти на комерцијална основа, а притоа ќе добиеме и одредени грантови преку редовните фондови на Европската Унија“, рече Анѓушев по средбите во Сојузното министерство за економија и енергетика на Германија.

Вицепремиерот Анѓушев за време на престојот во Берлин одржа и работни состаноци со претставници на германски компании пред кои ги презентираше можностите за инвестирање во земјата.

Пред претставниците на компанијата Унипер, реномирана компанија од енергетскиот сектор, беа презентирани можностите кои ги нуди новиот Закон за енергетика, пришто се потенцираше дека во земјата се реализираат акивности за изградба на примарен гасоводен систем, додека во план е реализација на секундарната гасификација, која е можност за инвестиција на оваа реномирана компанија. Дополнително тој ги запозна со можностите кои ги нуди Законот, за инвестиции во енергетски објекти од обновливи извори, фотонапонски и ветерни електрани и хидроелектрани.

 

Линк до инсерти од посетата:

Линк до изјави од вицепремиерот Анѓушев и г-дин Толксдорф: 

English
АКТУЕЛНОСТИ: