Со презентација на инвестициските можности на Република Македонија на бизнис форум во Хонг Конг денеска завршува посетата на владината делегација на Народна Република Кина. Бизнис презентацијата на Македонија во Хонг Конг е прва од ваков тип и досега вакво нешто не направила ниту една наша владина или деловна делегација. Во рамки на посетата на Хонг Конг, премиерот Никола Груевски оствари средба и со Доналд Цанг, извршен шеф на Специјалниот административен регион на Хонг Конг.

Владината делегација денес присуствува на бизнис- форумот во Шангај, 22 милионски град во источна Кина, чиј економски раст за минатата година е 8 проценти и во кој се развиени сите индустриски гранки.

Најголемиот дистрибутер на вино во Кина ќе потпише договор со девет винарски визби од Македонија за извоз на македонското вино од Македонија во Кина. Станува збор за компанија која за потребите на Кина увезува вино од целиот свет и која има повеќе од 600 дистрибутивни единици.

Претседателот на кинеската дистрибутивна винска компанија, Фу Сјуе Ју, на синоќешната презентација и дегустација во рамки на бизнис форумот во Ченгду, изразил особено задоволство од квалитетот на македонските вина и покажал сериозен интерес за продлабочување на соработката со македонските компании.

Македонија е мала европска економија, но таа е во подем и спроведува брзи реформи, а и значително ја прошири својата меѓународна трговија и финансиска интеграција.

Ова премиерот Никола Груевски го истакна на бизнис форум во Пекинг, претставувајќи ги економско-инвестициските политики на Македонија пред повеќе од 140 претставници на кинески компании.

Владина делегација предводена од премиерот Никола Груевски во чиј состав се и Заменик претседателот на Владата на Република Македонија, Владимир Пешевски, министерот задолжен за привлекување странски инвестиции, Веле Самак и директор на Агенцијата за странски инвестиции и поттикнување на извозот, Висар Фида од денеска престојува во политичко- економска посета на Народна Република Кина.

Делегацијата својот работен дел го започна со средба со делегација на кинеската државна компанија „Синохидро“, предводена од Џанг Јунли, претседател на компанијата. „Синохидро“, чиј делокруг на работа опфаќа инвестиции и реализација на проекти во енергетиката, инфраструктурата и недвижностите во својата област е најреномирана компанија во Азија и една од првите пет најреномирани во светот.